Xorijiy talabalar uchun ma'lumot

«Ilmga tayanamiz, ma'rifatni taraqqiy ettiramiz, bag‘rikeng jamiyat sari intilamiz!»

O‘zbekiston xalqaro islomshunoslik akademiyasi - O‘zbekiston Respublikasi Prezidenti tashabbusi bilan tashkil etilgan bo‘lib, u nafaqat mamlakatimizda, balki butun MDH hududida yagona va o‘ziga xos davlat oliy ta'lim muassasasidir. Akademiyada dunyoviy fanlar bilan bir qatorda islomshunoslik va dinshunoslik ham ilmiy asosda mukammal o‘rgatiladi. Bu yerda an'anaviy va zamonaviy bilimlar uyg‘unligida keng fuqarolik dunyoqarashiga ega, yuksak salohiyatli mutaxassislar tayyorlanadi.

Akademiyada ta'lim olishning afzalliklari
Keng qamrovli ta'lim dasturlari
Islomshunoslik, dinshunoslik, manbashunoslik, islom iqtisodiyoti kabi zamonaviy va muhim sohalarda mutaxassislik dasturlari taklif etiladi. Ta'lim dasturlari xalqaro andozalarga mos ravishda shakllantirilgan.
Yuqori malakali mutaxassislar
Akademiya professor-o‘qituvchilari – ilmiy salohiyatga ega mahalliy va xalqaro ekspertlardir. Ta'lim jarayoniga yetakchi xorijiy mutaxassislar ham jalb etilgan.
Dual ta'lim tizimi: nazariya va amaliyot uyg‘unligi
Akademiyada “4+2” formatidagi dual ta'lim tizimi joriy etilgan bo‘lib, unga ko‘ra bitiruvchi kurs talabalari haftaning 4 kuni nazariy bilimlarni Akademiyada, 2 kuni esa ilmiy-tadqiqot va davlat tashkilotlarida mutaxassislar rahbarligida amaliy mashg‘ulotlar o‘tab, tajriba to‘playdilar.
An'ana va innovasiya uyg‘unligi
Akademiyada ilm-fan, an'analar va zamonaviy pedagogik texnologiyalar uyg‘unlashgan holda ta'lim beriladi. Bu esa talabalarni nafaqat nazariy, balki amaliy ko‘nikmalarga ega bo‘lishga xizmat qiladi.
Halqaro hamkorlik va imkoniyatlar
Akademiya xorijiy ilmiy va ta'lim muassasalari bilan yaqin hamkorlik qiladi. Talabalar uchun stajirovkalar, akademik almashinuv va ilmiy tadqiqotlarda ishtirok etish imkoniyatlari mavjud.

Bakalavriat ta'lim yo‘nalishlari:
– Dinshunoslik 
– Islomshunoslik 
– Tarix
– Xalqaro munosabatlar
– Turizm va mehmondo‘stlik
– Jahon iqtisodiyoti va xalqaro iqtisodiy munosabatlar
– Axborot xavfsizligi
– Psixologiya

Magistratura mutaxassisliklari:
– Qiyosiy dinshunoslik
– Islomshunoslik
– Islom huquqi
– Psixologiya
– Tarix
– Turizm va mehmondo‘stlik
– Matnshunoslik va adabiy manbashunoslik
– Iqtisodiyot
– Lingvistika 
– Xalqaro munosabatlar va zamonaviy siyosiy jarayonlar
– Axborot xavfsizligi
– Tashqi iqtisodiy faoliyat
– Ijtimoiy-diniy sohadagi jarayonlar, radikallashuv jarayonlari tahlili  va ularning oldini olish usullari

Doktorantura ixtisoslikliklari:
– Dinshunoslik
– Islom tarixi va manbashunosligi
– Qur'onshunoslik. Hadisshunoslik
– Fiqh ilmi, kalom ilmi. Ilohiyot
– Mumtoz sharq adabiyoti va manbashunosligi
– Din psixologiyasi

Talabalar turar joyi

Akademiya talabalar turar joyi faoliyatiga oid asosiy me’yoriy hujjat “Talabalar turar joyi” to‘g‘risidagi Nizom hisoblanadi. U Oliy va o‘rta maxsus ta’lim vazirligining 2017 yil 23 avgustdagi 600-sonli buyrug‘i asosida ishlab chiqilgan va O‘zbekiston xalqaro islom akademiyasi Kengashining 2018 yil 30 avgustdagi 1-son majlisi qarori bilan tasdiqlangan. Shuningdek, TTJ Akademiyaning ichki tartib qoidalari Nizomi, TTJ “Talabalar kengashi” ish rejasi asosida faoliyat yuritadi.

Akademiya hovlisida joylashgan 1 ta binodan iborat Talabalar turar joyi (TTJ) 250 nafar talaba o‘ringa mo‘ljallangan.

TTJning birinchi qavatida o‘quv zali, ma’naviyat va ma’rifat xonasi, tarbiyachilar xonalari joylashgan. Bundan tashqari, barcha etajlarda o‘quv xonasi, oshxona, hojatxona, yuvinish xonasi, dush ham mavjud. Talabalar yashash xonalari dars qilish va yashash uchun kerakli bo‘lgan mebel va boshqa jihozlar bilan ta’minlangan.

Har bir qavatda zamonaviy televizorlar va WiFi qurilmalari o‘rnatilgan bo‘lib, talabalar yurtimizda va jahonda yuz berayotgan so‘ngi o‘zgarishlar, mamlakatimizda olib borilayotgan islohotlar bilan tanishib boradilar hamda madaniy hordiq chiqaradilar.

TTJda talabalar o‘zini-o‘zi boshqaruv tizimini joriy etish maqsadida, shu yerda istiqomat qiluvchi faol va jamoatchi talabalar orasidan tanlov asosida TTJ va qavatlar sardorlari tayinlanadi. Ular TTJdagi shart-sharoitlar, talabalarning ichki tartib-intizomga rioya etishi, talabalar navbatchiligi, shu yerda o‘tkaziladigan ma’naviy-marifiy tadbirlar va turli bayramlarga tayyorgarlik kabi masalalar muhokama qiladilar.

Akademiya talabalar turar joyida tarbiyaviy ishlarga Yoshlar bilan ishlash bo‘yicha prorektor boshchiligida fakultet dekanlari, Yoshlar bilan ishlash, ma’naviyat va ma’rifat bo‘limi, yoshlar bilan ishlash bo‘yicha dekan o‘rinbosarlari, professor-o‘qituvchilar va murabbiylar jalb etilgan.

Shuningdek, Talabalar turar joyida faoliyat olib boradigan tarbiyachi-pedagog talabalarning ma’naviy-axloqiy tarbiyasi bo‘yicha mas’ul etib tayinlangan bo‘lib, muntazam ravishda talabalar bilan tarbiyaviy ishlar amalga oshirib boradi.

Akademiya rahbariyati, talabalar turar joyi ma’muriyati, O‘zbekiston yoshlar ittifoqi Akademiya boshlang‘ich tashkiloti hamda kafedra professor-o‘qituvchilari talabalarning istak va xohishlaridan kelib chiqib, turli ma’naviy-ma’rifiy, tarbiyaviy tadbirlar, uchrashuvlar, davra suhbatlari tashkil etadi.

Akademiya talabalar turar joyida yashovchi talabalar bo‘sh vaqtlarini mazmunli o‘tkazish va ular orasida sog‘lom turmush tarzini targ‘ib etish maqsadida oliygohning sport zalida turli sport, til o‘rganish to‘garaklari, kompyuter savodxonligi, to‘quvchilik, pazandachilik, qo‘l mehnati to‘garaklari faoliyat yuritmoqda. Uy hamshiraligi, badiiy havaskorlik kabi to‘garaklar tashkil etilishi rejalashtirilgan.

Viza olish jarayoni

Turar joy uchun ro‘yxatga qo‘yish hamda viza olish jarayoni

Xorijiy fuqarolarga viza rasmiylashtirish, viza taklifnomalarini tayyorlash hamda turar joy uchun vaqtinchalik ro‘yxatdan o‘tkazish oliy ta’lim muassasalarining O‘zbekiston Respublikasi Oliy va o‘rta maxsus ta’lim vazirligi bilan o‘zaro kelishuvi asosida O‘zbekiston Respublikasi Tashqi ishlar vazirligiga taqdim etilgan holda amalga oshiriladi. Xorijiy fuqarolar uchun vizalar nomzodning o‘z davlatida joylashgan O‘zbekiston Respublikasining elchixonasi yoki konsullik idorasi tomonidan taqdim etiladi.

O‘zbekiston Respublikasi elchixonasi yoki konsullik idorasi mavjud bo‘lmagan mamlakat fuqarolar vizalari Toshkentdagi xalqaro aeroportda ham taqdim qilinishi mumkin.

Xorijiy talabalar bilan ishlash bo‘limi telefon raqami:

+99871 2449593

E-mail: intstudents@iiau.uz