O‘zbekiston Respublikasi Mustaqilligining 34 yilligi munosabati bilan O‘zbekiston xalqaro islomshunoslik akademiyasi rektorining BAYRAM TABRIGI

Assalom-u alaykum qadrli hamkasblar! 

Aziz talaba-yoshlar! 

Mana shu farahbaxsh kunlarda Sizlarni yangi O‘zbekiston tarixidagi ulug‘ va shonli sana – Vatanimiz Mustaqilligining 34 yillik bayrami bilan samimiy muborakbod etaman!

Yosh avlodni barkamol voyaga yetkazish, yetuk mutaxassis-kadrlarni tayyorlash orqali Vatanimiz mustaqilligini mustahkamlash, uning taraqqiyotini kafolatlash va xalqimiz farovonligini ta’minlash yo‘lidagi fidokorona faoliyatingizga muvaffaqiyat tilayman! 

Bosib o‘tilgan o‘ttiz to‘rt yillik davr bizga milliy davlatchiligimiz rivoji uchun yuz yilliklarga teng bo‘lgan tarixiy voqea va natijalarni tuhfa etdi. Xalqimiz fidokorona mehnati va qat’iyati bilan yurtimizning iqtisodiy tarmoqlarini jadal rivojlantirish, aholining turmush farovonligini oshirish, bir so‘z bilan aytganda, yangi O‘zbekiston poydevorini yaratishda Prezidentimiz bilan yelkama yelka xizmat qilmoqda. 

Zero, bu yil O‘zbekiston mustaqilligining 34 yilligi tadbirlari “Vatan uchun, millat uchun, xalq uchun!” degan bosh g‘oya ostida tashkil etilayotganida ham katta ma’no mujassam. Ushbu shior asosida mamlakatimizdagi har bir xonadon, barcha hudud va muassasalarda bayram tantanalari keng miqyosda nishonlanmoqda. 

Muhtaram hamkasblar, aziz talabalar! 

Keyingi yillarda mamlakatimizda barcha sohalarda bo‘lgani kabi ta’lim sohasini sifat jihatdan rivojlantirishga ham ustuvor vazifa sifatida qaralmoqda. 

Binobarin, Prezidentimiz Shavkat Miromonovich Mirziyoyev ta’kidlaganidek, “Bugungi nihoyatda murakkab va tahlikali davr oldimizga yangi-yangi sinov va muammolarni ko‘ndalang qilib qo‘ymoqda. Lekin hayot qanchalik mashaqqatli bo‘lmasin, mamlakatimizda demokratik islohotlarni izchil davom ettirib, xalqimizni rozi qilishga, tinchlik va barqarorlikni mustahkamlashga bor kuch va imkoniyatlarimizni safarbar etamiz”. 

Bugun xalqimiz ulug‘ maqsadlar bilan Uchinchi Renessans davriga qadam qo‘ymoqda. Muhtaram Prezidentimiz Shavkat Mirziyoyev tashabbusi bilan boshlangan bu muhtasham yo‘l xalqimizni ulug‘ maqsadlar sari ruhlantirayotir. Yurtimiz tinchligi va daxlsizligi, millatlararo totuvlik, diniy bag‘rikenglik hamda hamjihatlikni mustahkamlash borasidagi demokratik islohotlar dunyo hamjamiyatining ham e’tirofiga sazovor bo‘lmoqda. 

Navqiron yoshlar! 

Bugun yurtimizda yoshlarga qaratilayotgan e’tibor, g‘amxo‘rlik mamlakatimizda olib borilayotgan siyosatning eng ustuvor yo‘nalishi hisoblanadi. Bu borada atoqli ma’rifatparvar jadid bobolarimizdan biri Abdullo Avloniyning yoshlarimiz tarbiyasi xaqidagi quyidagi so‘zlari e’tiborga molikdir: 

“Tarbiya bizlar uchun yo hayot – yo mamot, yo najot – yo halokat, yo saodat – yo falokat masalasidur”. 

Ilm olishni o‘zining bosh vazifasi deb bilgan o‘g‘il-qizlarimiz uchun istiqlol ayyomi shodiyonalari ta’lim muassasalaridagi “Bilimlar kuni” tantanalari bilan davom etadi. Shu o‘rinda joriy yilda O‘zbekiston xalqaro islomshunoslik akademiyasi talabalar safidan o‘rin egallagan barcha o‘g‘il-qizlarimizni ham ijodiy imtihonlar, test sinovlaridan muvaffaqiyatli o‘tib, talaba degan sharafga ega bo‘lganliklari muborakbod etaman! 

Yangi o‘quv yilini Akademiya jamoasi ajoyib xushxabar bilan boshlamoqda. Kuni kecha O‘zbekiston Respublikasi mustaqilligining o‘ttiz to‘rt yilligi munosabati bilan Prezident Farmoni imzolanib, Vatanimiz mustaqilligini mustahkamlash, yoshlarimizni ona yurtga muhabbat va sadoqat ruhida tarbiyalashdagi ulkan xizmatlari uchun bir guruh vatandoshlarimiz qatorida O‘zbekiston xalqaro islomshunoslik akademiyasi “Arab tili va adabiyoti al-Azhar kafedrasi” dotsenti, biz uchun qadrli ustoz Abdulhay Abdullayev “Imom Buxoriy” ordeni bilan bilan taqdirlandi. 

O‘ylaymanki, davlatimiz va xalqimizning ushbu e’tirofi Akademiyaning butun pedagogik jamoasi, ustoz-murabbiylari faoliyatiga bergan bebaho bahosi, mukofotidir! Yana bir bor ustozni ushbu orden bilan samimiy tabriklab qolaman! 

Bugun O‘zbekiston xalqaro islomshunoslik akademiyasi yangi o‘quv mavsumiga shay holatda. O‘g‘il-qizlarimizning tanlagan ixtisosliklari bo‘yicha xalqaro andozalar asosida ilm-fan sirlarini o‘rganishi uchun barcha sharoitlar yaratilgan. 

Davlatimiz rahbarining yoshlarga qarata aytgan “Marrani baland oling, siz buyuk ishlarga qodirsiz!” degan xitoblariga amal qilgan holda barcha talabalarning ilm-fan sirlarini o‘rganishda yanada faol bo‘lib, Vatanimiz ravnaqiga hissa qo‘shadigan yetuk kadr sifatida kamol topishlariga tilakdoshman! 

Yana bir bor barchangizni eng ulug‘, eng aziz bayram – Mustaqillik ayyomi bilan tabriklagan holda sihat-salomatlik, oilangizga fayzu baraka, o‘qish va ishlaringizga muvaffaqiyatlar tilayman! 

Vatanimiz mustaqilligi, xalqimiz tinchlik-totuvligi abadiy bo‘lsin!  

Muzaffar KAMILOV,

O‘zbekiston xalqaro islomshunoslik akademiyasi rektori